Gwamnatin Kano Ta Cafke Kwayoyi Miliyan 3.18 a Unguwar Nomansland

Gwamnatin Kano Ta Cafke Kwayoyin Pregabalin Miliyan 3.18 a Unguwar Nomansland

Daga Jihar KANO, NIGERIA – Gwamnatin Jihar Kano ta sanar da cafke kwayoyin maganin Pregabalin guda 3,180,000 a unguwar Nomansland da ke Sabon Gari, a wani samame da Kwamitin Yaƙi da Shaye-Shaye da Safarar Miyagun Ƙwayoyi na jihar ya gudanar.

Wannan samame na daga cikin matakan da gwamnatin jihar ke ɗauka domin yaƙi da safarar miyagun ƙwayoyi da kuma kare lafiyar al'ummar jihar, musamman matasa.

An kafa kwamitin ne bisa umarnin Gwamnan Jihar Kano, Alhaji Abba Kabir Yusuf, domin ƙarfafa yaƙi da shaye-shaye da safarar miyagun ƙwayoyi a faɗin jihar.

Pregabalin magani ne da likitoci ke rubutawa domin magance wasu matsalolin lafiya, ciki har da ciwon jijiyoyi da farfaɗiya. Sai dai amfani da shi ba bisa ƙa'ida ko ba tare da kulawar likita ba na iya haifar da jaraba, matsanancin bacci, jiri, rikicewar tunani da sauran matsalolin lafiya.

Gwamnatin jihar ta bayyana cewa wannan nasara ta ƙara tabbatar da aniyarta ta yaƙi da shaye-shaye da safarar miyagun ƙwayoyi, tare da ƙarfafa haɗin gwiwa tsakanin hukumomin da abin ya shafa.

Haka kuma, gwamnatin ta jaddada ƙudurinta na kare al'umma da samar da yanayi mai kyau wanda matasa za su samu damar gudanar da rayuwarsu cikin ƙoshin lafiya da kwanciyar hankali.

Tushen Rahoto: Ibrahim Adam, Mai Ba Gwamnatin Jihar Kano Shawara na Musamman kan Harkokin Soshiyal Midiya (Special Adviser, Social Media).

Rahoto: Pen Times Magazine