BABU ABUNDA ZAI HANA NI SHIGA ZABEN 2027

Atiku Ya Sha Alwashin Ci Gaba Da Neman Shugabancin Ƙasa A 2027 Duk Da Hukuncin Kotu:

Tsohon Mataimakin Shugaban Ƙasar Najeriya kuma ɗan takarar shugaban ƙasa a jam'iyyar African Democratic Congress (ADC), Atiku Abubakar, ya bayyana cewa ba zai janye daga takarar shugaban ƙasa ta shekarar 2027 ba, duk da hukuncin da wata Babbar Kotun Tarayya ta yanke a baya-bayan nan wanda ya shafi shugabancin jam'iyyarsa da tsarin tsayar da ɗan takararta.

Atiku ya bayyana hakan ne a cikin wata sanarwa da ya fitar ranar Juma'a a Sakkwato, inda ya jaddada cewa babu wani hukuncin kotu, matsin lamba na siyasa ko barazana da zai tilasta masa janyewa daga takarar shugaban ƙasa.

Ya bayyana cewa ya kamata a bai wa 'yan Najeriya damar yanke shawarar makomarsu ta siyasa ta hanyar gudanar da zaɓe na gaskiya, adalci da sahihanci.

Atiku ya ce: "Ina so in bayyana wa dukkan 'yan Najeriya da suka tsaya tare da mu cewa ina cikin wannan takara. Ba zan je ko'ina ba. Za mu kasance cikin 'yan takarar da za su fito a kan katin zaɓe."

Tsohon mataimakin shugaban ƙasar ya bayyana hukuncin kotun a matsayin wani ɓangare na abin da ya kira yunƙurin raunana jam'iyyun adawa da kuma kawo cikas ga fafatawar siyasa gabanin zaɓen shekarar 2027.

Ya kuma zargi masu mulki da amfani da matsin lambar siyasa da dabarun shari'a wajen kawo cikas ga jam'iyyun adawa, maimakon barin 'yan Najeriya su tantance ayyukansu.

Haka kuma, Atiku ya nuna damuwa kan zargin yunƙurin yin maguɗi a rajistar masu zaɓe ta hanyar amfani da hotunan da aka ƙirƙira da fasahar Artificial Intelligence (AI), sunayen ƙarya da kuma bayanan mutanen da ba su wanzu, yana mai gargaɗin cewa irin waɗannan abubuwa za su iya kawo cikas ga sahihancin zaɓe.

Wannan na zuwa ne bayan hukuncin da Babbar Kotun Tarayya ta yanke ranar Alhamis, 5 ga Nuwamba, 2026, ƙarƙashin jagorancin Mai Shari'a Peter Lifu a Abuja.

Kotun ta soke shugabancin kwamitin riƙon ƙwarya na jam'iyyar ADC ƙarƙashin jagorancin David Mark, tare da soke wasu matakai da shawarwarin da shugabancin ya ɗauka, ciki har da tsarin da ya kai ga tsayar da Atiku a matsayin ɗan takarar shugaban ƙasa na jam'iyyar.

Nafiu Bala Gombe, tsohon Mataimakin Shugaban Ƙasa na Ƙasa na jam'iyyar, ne ya shigar da ƙarar, inda yake ƙalubalantar yadda aka kafa shugabancin riƙon ƙwaryar.

Bayan hukuncin, jam'iyyar ADC ta bayyana aniyarta ta ɗaukaka ƙara zuwa Kotun Ɗaukaka Ƙara.

Hukuncin ya haifar da martani daga masu ruwa da tsaki a siyasar Najeriya, ciki har da Ministan Sufurin Jiragen Sama, Festus Keyamo, wanda shi ma ya yi tsokaci kan yiwuwar cire Atiku daga cikin waɗanda za su tsaya takara a zaɓen shugaban ƙasa na 2027.

Ana sa ran batun shari'a da rikicin siyasa da ke tattare da jam'iyyar ADC zai ci gaba da jan hankalin jama'a yayin da Najeriya ke shirin tunkarar babban zaɓen shekarar 2027.

PEN TIMES MAGAZINE